કંટક નથી હોતી

કદી લજ્જાવિહોણી આંખડી મોહક નથી હોતી,
નજર તો હોય છે કિન્તુ હ્રદયવેધક નથી હોતી.

અમારી જિંદગાનીની અદાઓ પણ અનોખી છે!
ઘડી લાયક, ઘડીમાં જીવવા લાયક નથી હોતી.

જવાની ની કસમ, ઉઠતી જવાની પણ મદિરા છે,
મદિરા પણ ખરેખર એટલી માદક નથી હોતી.

જમાનાની નજરમાં કોણ જાણે કેમ ખટકે છે!
અમારી જિંદગાની આમ તો કંટક નથી હોતી.

રગે રગમાં ખુશીની લ્હેર દોડી જાય છે ‘ઘાયલ’!
કયા સૌન્દર્યની ઝાંખી જીવનપ્રેરક નથી હોતી!