મોત કેરા જામની

નામની છે હસ્તી એની નામની
ધૂનહીણી જિંદગી શા કામની?.

કામ ના આવે રહે ના કામની,
જિંદગી એવી બળી આરામ ની,

નીચ માં શું તત્વ કમ છે ઉચ્ચ થી?
ઠીકરામાં પણ છે માટી કામની.

જિંદગી કેવો મજાનો શબ્દ પણ,
છે મદિરા મોત કેરા જામની.

આગ આંટો લઇ ગઇ છે ગામને,
અવદશા બેઠી છે આખા ગામની.

દર્દ ઉઠ્યું આજ કંઇ એવી રીતે,
કે મજા આવી ગઇ આરામની.

ક્યાંય પણ મન બેસવા દેતું નથી!
છે જગાઓ તો ઘણી વિશ્રામની.

હાલમાં ‘ઘાયલ’ કરી છે અખ્તિયાર,
દંડ કરનારાએ નીતિ ડામની.